•._.•Prem Sadhna•._.•Part 1

¯`•._.•Prem Sadhna Part One•._.•´¯

Purnima ki raat hai, chaand ki chaandni charo aur faili huyi hai. Varsha apni balcony mein khadi huyi chaandni mein lahlahaate kheto ko dekh rahi hai. Par uska dil bahut bechain hai


“Uff ye chaandni raat kya aaj hi honi thi, ab main kaise baahar jaaungi, kishi ne dekh liya to mushibat ho jaayegi. Andhera hota to araam se nikal jaati. Ab kya Karun ? ……. Madan mera intezaar kar raha hoga, kaise jaaun main ab………… vaise mujhe yakin hai ki vo meri mazburi samajh jaayega”


Varsha man hi man ye sab soch rahi hai



Idhar madan bhi chaandni raat mein lahlahaate kheto ko dekh raha hai. Aisa lag raha hai jaise ki havaayein chaandni raat mein kheto mein geet ga rahi hain. Bahut hi sunder nazaara hai. Par madan jyada der tak ish nazaare mein kho nahi pata kyonki vo badi bechaini se varsha ka intezaar kar raha hai


Vo soch raha hai ki agar varsha kishi tarah se aa gayi to vo dono pehli baar aisi tanhaayi mein milenge.

Aaj subah varsha ne mandir ke baahar madan se kaha tha, “madan pita ji mere liye ladka dhund rahe hain, mujhe bahut dar lag raha hai”

“Tum chinta mat karo…aisa karo aaj raat apne banglow ke peeche ke khet mein milo ……hum araam se baat karenge”

“main vaha kaise aaungi madan, mujhe dar lagta hai”

“Mujhe itna pyar karti ho, phir mujh se akele mein milne se kyo darti ho”

“Vo baat nahi hai madan, main to ye kah rahi thi ki raat ko ush sunsaan khet mein kaise aaungi mein, kishi ne dekh liya to”

“ush khet ki zimmedari mujh par hai, main hi raat bhar uski rakhvaali karta hun, vaha darne ki koyi baat nahi hai, tum aao to sahi hum dher saari baate karenge”


“Vo to theek hai ………… Acha main koshis karungi, mere liye ghar se nikalna bahut muskil hoga, par main puri koshis karungi”

Ye baatein huyi thi subah mandir ke baahar dono ke beech

Idhar varsha abhi bhi kasamkash mein hai ki kya kare kya na kare. Vo himmat karke chalne ka fansla karti hai

Vo chupchaap seedhiyon se dabe paanv neeche utarti hai aur ghar ke peeche ki dewar par chad kar khet mein utar jaati hai. magar har pal uska dil dar ke maare dhak dhak kar raha hai


“Kahan hai ye madan, ushe kya yaha nahi khade rahna chaahiye tha, main akeli kaise ushe dhundungi” --- varsha man hi man badbada rahi hai.


Idhar madan ko bhi ahsaas hota hai ki ushe varsha ke banglow ki taraf chalna chaahiye

“Agar varsha aa rahi hogi to akeli dar jaayegi”

Vo sochta hai aur varsha ke banglow ki taraf chal deta hai.


Varsha dari dari aage badh rahi hai, vo saamne se aate ek saaye ko dekh kar dar jaati hai aur vaapis mud kar bhaagne lagti hai.


“arey ruko varsha, ye main hun tumhaara madan” --- madan peeche se awaaj lagaata hai

Varsha ruk jaati hai aur peeche mud kar dekhti hai ki madan uski taraf dauda chala aa raha hai


“Tumhe meri bilkul parvaah nahi hai, kya tumhe banglow ke paas nahi hona chaahiye tha”

“Varsha pita ji saath the, vo aaj mujhe ghar bhej kar khud khet mein rukna chaahte the, badi muskil se unhe yahan se bheja hai”

“Pata hai kitna dar lag raha tha mujhe, main kabhi bhi raat ko aise baahar nahi nikli hun, aisa lag raha tha ki koyi mera peecha kar raha hai” --- varsha ne gusse mein kaha


“Main samajh sakta hun varsha, mere bas mein hota to mein khud tumhe apni godi mein utha kar laata” ---- madan ne kaha

“Bas-bas rahne do”

“Main sach kah raha hun varsha mera yakin karo”

Ye kah kar madan varsha ko apni baahon mein jakad leta hai

Varsha ke tan badan mein beejli daud jaati hai, vo pehli baar madan ki baahon mein thi, vo bhi raat ki tanhaayi mein


“Chhodo mujhe madan ye kya kar rahe ho”

“Varsha main bahut khus hun …… mujhe bilkul yakin nahi tha ki tum aaogi….. mujhe thodi der apne karib rahne do”

“mujhe sharam aa rahi hai madan, chhodo na”

Madan varsha ko chhod deta hai, aur apni aankho mein aaye aansuvo ko ponchne lagta hai

“kya huva madan ?…. mujhse koyi galti huyi kya ? ….. theek hai bhar lo mujhe baahon mein, main to bas ye kah rahe thi ki mujhe sharam aa rahi hai. pehle kabhi tumhaare itne karib nahi aayi na…..” ---- varsha madan ke kandhe par haath rakh kar kahti hai

“Varsha jab se tumse pyar huva hai kabhi sapne mein bhi nahi socha tha ki tumhaare itne karib aa paaunga. Aankhe bhar aayi hain tumhaare itne karib aa kar, kahan tum kahan main” – madan ne bhaavuk ho kar kaha

“kahan tum kahan main ka kya matlab ???, ab pyar mein bhi kya ye sab socha jaata hai”

“Vo to theek hai varsha par tum nahi jaanti tumhaara pyar mere liye ek khwaab sa lagta hai. Hum dauno aksar aankho aankho mein baat karte aaye hain, bahut kam hum dauno ne muh se baat ki hai, vaise bhi yaha milne ka mauka hi kaha hai jo kuch baat karein. Bade dino baad aaj mandir ke baahar baat huyi thi aur aaj hi pehli baar hum tanhaayi mein mil rahe hain…. Kya ye sab sapna sa nahi lagta?”

“haan madan mujhe bhi ye sapna sa lagta hai, pata nahi main kyon tumse pyar kar baithi hun, mujhe ache se pata hai ki ish pyar ka anjaam bahut bhayaanak hoga par phir bhi jaane kyon…. Mera dil bas tumhaare liye dhadakta hai”

“Varsha chalo kahin bhag chalte hain, yaha se bahut dur jaha ye unch-neech, jaat-paat ki dewar na ho”


“Madan main tumhare saath kahin bhi chalne ko taiyar hun par pita ji hamein dhund nikaalenge aur hamein vo khaufnaak saja milegi jishki tum kalpana bhi nahi kar sakte”

“Maut se jyada khaufnaak kya ho sakta hai varsha”


”Tum abhi mere pita ji ko nahi jaante, vo tumhaare pure parivaar ko tabaah kar denge, main aisa hargiz nahi hone dungi”

“To iska kya ye matlab hai ki ish pyar ko hum bhul jaayein aur ish duniya ke aage ish pyar ka balidaan kar dein”


“Maine aisa to nahi kaha madan”

“Phir tum kahna kya chaahti ho”


“Hum saath jee nahi sakte par saath mar to sakte hain”

Ye kahte huve varsha ki aankho mein aansu utar aaye

“Ye kya paagalpan hai varsha… aise dil chota karne se kya hoga, agar bhagvaan ne ish pyar mein hamaari maut hi leekhi hai to kyon na hum ek koshis karke marein, kya pata hamaare sache pyar ke aage bhagvaan ka dil peeghal jaaye aur vo hamein ek khushaal zeendagi de dein”

“Kaisi kosish madan, main samjhi nahi” varsha ne apne aansu ponchte huve kaha


“Hum yaha se bahut dur chale jaayenge, bahut dur…. jaha kishi ko hamari jaat paat ka pata na ho”


“Hum kaha rahenge madan, hamare paas kuch bhi to nahi hai”


“Jish bhagvaan ne ye pyar banaaya hai vahi ish pyar ko manjil tak bhi ley jaayenge, chalo sache man se apne pyar ke liye ek koshis karte hain, baaki sab bhagvaan par chhod dete hain. Koshis karne se kuch bhi mil sakta hai varsha, bina koshis kiye haar maan-na is pyar ka apmaan hoga”


“Main tumhaari hun madan, mujhe jahan chaahe vaha ley chalo, mujhe apni chinta nahi hai. apni chinta hoti to ye pyar hi na karti. Mujhe bas tumhaari aur tumhaare ghar walo ki chinta hai”

“tum kishi ki chinta mat karo, jishne ye jeevan diya hai vahi iski raksa bhi karenge, mujhe bhi apne ghar walo ki chinta hai, par main apne dil ke haatho majbor hun, mujhe yakin hai ki sab kuch theek hoga” ---- madan ne kaha

“theek hai madan jaisa tum theek samjho”




chand ki chaandni charo taraf faili huyi hai aur do pyar mein dube dil duniya ki har dewar ko tod kar aage badhna chaahte hain.


Hare hare khet ke ek kone mein aam ke vriksha ke niche do dil apne pyar ko manjil tak ley jaane ki baate kar rahe hain.

“Varsha ek baat bataao”

“haan pucho”

“kya tumhe dar nahi laga mere paas tanhaayi mein aate huve”

“madan ek tum hi ho jisko mein kabhi bhi kahin bhi mil sakti hun, tumse itna pyar jo karti hun, varna mujhe har aadmi se dar lagta hai”

“aisa kya hai mujh mein varsha ?”

“Tumhe yaad hai aaj se karib 4 saal pehle jab mein kheto mein rasta bhatak gayi thi tab tum mujhe ghar tak chhod kar aaye the. Andhera hone ko tha aur tum mujhe bade pyar se samjha rahe the ki ‘daro mat main tumhaare saath hun na’. Ush din pita ji se khub daant padi thi ish baat ko ley kar ki main kyon apni saheliyon ke saath kheto mein ghumne gayi thi. par sab kuch bhula kar raat bhar main bas tumhe hi soch rahi thi. ush din tum jaane anjaane mere dil ke ek kone mein apna ghar bana gaye the”


“Vo din mujhe bhi yaad hai, ush din tumhe pehli baar dekha tha maine, pata nahi tha ki tum kaun ho kaha se ho. Tum khet ke ek kone mein pareshaan si khadi thi. main tumhe dekhte hi samajh gaya tha ki tum rasta bhatak gayi ho. jab maine pucha tha ki kya baat hai ? tumne roni surat bana kar kaha tha, “mujhe ghar jana hai” aur maine kaha tha chalo main tumhe ghar chhod deta hun”

“Us vakt main bahut dar gayi thi madan, meri saheliyan jaane kahan thi aur andhera ghir aaya tha, aur vo pehli baar tha ki main ghar se aise baahar thi”

“Haan tum to mujh se bhi dar rahi thi”

“Main tumhe tab jaanti nahi thi, darna laazmi tha, akeli ladki ke saath kuch bhi ho sakta hai, par mujhe acha laga tha ki tum mujhe bade pyar se samjha rahe the”

“Haan par badi muskil se tum mere saath chali thi”

“Tumhaare saath tab mazburi mein chali thi lekin aaj tumhaare saath apni khusi se kahin bhi chalne ko taiyar hun”



“Itna pyar kyon karti ho tum mujhe varsha ?”

“Pata nahi madan, mujhe sach mein nahi pata”

“yaad hai jab maine tumhaare ghar ke baare mein pucha tha to tum bade garur se boli thi ki main rudra pratap singh ki beti hun”

“Main tumhe daraana chaahti thi taaki tum kuch aisa vaisa na socho, aur tum mere pita ji ka naam sun kar dar bhi to gaye the”




“Unke naam se yaha kaun nahi darta varsha, unke ek ishaare par kishi ki bhi jaan ja sakti hai”


“Par 4 din baad hi tum mein bahut himmat aa gayi thi, mujhe laal gulab ka phool de kar gaye the vo bhi bade ajeeb tarike se. main mandir se nikal rahi thi aur tum mere raste mein gulab ka phool fenk kar bhag gaye the, main tumhe dekhti rahi par tumne peeche mud kar bhi nahi dekha. aaj tak sambhal kar rakha hai maine vo phool”

“pata nahi kya ho gaya tha mujhe, darte darte tumhaare raste mein phool fenka tha, vo to sukar tha ki kisi ne dekha nahi verna musibat ho jaati”

“Maine bhi darte darte vo phool uthaaya tha, vo pal aaj tak meri aankho mein ghumta hai, tum to phool fenk kar bhaag gaye the, uthaate vakt mujh par jo beeti thi vo main hi jaanti hun”



“aur agle din tumne kya kiya tha, khud bhi to ek gulab vahin usi jagah gira diya tha jahan maine apna gulab fenka tha. agle din tum mein kaha se himmat aa gayi thi?”

“pata nahi, tumhaare pyar ka jwab pyar se dena chaahti thi”

“varsha maine bhi tumhaara gulab aaj tak sambhaal kar rakha hai”


dauno hans padte hain

“madan pehli baar hum ye sab baate kar rahe hai, jeendagi ne hame ab tak milne ka moka kyon nahi diya”

“ho sakta hai ki hamne ab tak koshis hi na ki ho, aaj tum mandir ke baahar na milti to shaayad aaj bhi na mil paate”

“madan chaahe kuch ho jaaye mera saath mat chodna, main tumhe bahut pyar karti hun”

“arey pagli kahin ki…. ye pyar kya saath chodne ke liye kiya hai maine. Main to har haal mein ish pyar ko manjil tak ley jaana chaahta hun”

“ek baat puchu madan”

“haan pucho na”


“pyar kitna ajeeb hota hain na, hum in chaar saalo mein bahut kam mile hain phir bhi dil mein pyar har pal badhta hi gaya hai, aisa kyon hai ?”


“Vahi to main bhi kah raha tha, dekho ek tarah se aaj hamaari pehli mulaakaat hai lekin aisa lagta hai ki hum har pal saath rahte hain, pata hai aisa kyon hai ?”

“nahi to, tum bataao na”


“har pal hum ek dusre ko jo sochte rahte hain”

“tumhe kaise pata ki main tumhe sochti rahti hun ?”

“bas andaaja lagaaya kyonki mein to har pal tumhaare khayaalo mein duba rahta hun”

“bina ek dusre se mile bhi hum ek dusre mein khoye rahte hain kitna pyara ahsaash hai na ye madan”

“bilkul varsha jeendagi mein ish se pyara ahsaash hamein nahin mil sakta”

“madan ek baat bataao kya tumhe mere alawa koyi aur ladki pasand aa sakti hai”

“sawaal hi paida nahi hota varsha, tumhaare alawa mein kishi ko nazar utha kar dekhta bhi nahi hun”


“aisa hai kya ?”

“bilkul varsha, jo pyar tumne mujhe diya hai vo pyar mujhe kahin nahi mil sakta. tumhaara dil kitna bada hai. itne bade ghar ki beti hote huve bhi tumne mujh garib se pyar kiya, vo bhi sab jaat paat bhula kar”

“jaat paat ka matlab mujhe nahi pata madan mujhe bas itna pata hai ki mujhe bas tumse pyar hai”


madan bhavuk ho kar varsha ko apni baahon mein bhar leta hai aur madhosh ho kar varsha ki kamar par haath phiraane lagta hai. kab madhosi mein uske haath phisalte huve varsha ke nitambo tak pahunch jaate hain ushe pata hi nahi chalta

jaise hi varsha ko apne nitambo par madan ke haath mahsush hote hain vo madan ko dur jhatak deti hai aur madan ki baahon se azaad ho kar madan se muh pher kar khadi ho jaati hai


“kya huva varsha, mujh se koyi bhool huyi kya ?”


“tumhaare pyar mein vaasna utar aayi hai madan, mujhe vaha kyon chuva tumne ? …..mujhe dar lag raha hai”


Madan varsha ke saamne aa kar uske kadmo mein baith jaata hai aur varsha ke kadmo ko chum kar kahta hai, “ ye vaasna nahi mera pyar hai varsha. main to bas tumhe apne karib mahsus karne ki kosish kar raha tha, agar tumhe bura laga hai to mujhe maaf kar do”


Varsha madan ko koyi jawab nahi deti aur phoot phoot kar rone lagti hai


“kya huva varsha kya mujh se itna bada gunaah ho gaya ki tum ish tarah se ro rahi ho, kya mera tum par itna bhi haq nahi ki tumhe apne karib mahsus kar sakun ?”

“main sab kuch bhool chuki thi lekin tumne phir se sab kuch yaad dila diya”

“kya yaad dila diya varsha ?, main samjha nahi”


“Madan main aaj tumhe apni jeendagi ka vo dard bataana chaahti hun jo maine aaj tak kishi ko nahi bataaya, kya tum sun paaoge?”


“Mera dil baitha ja raha hai varsha, jaldi bataao ki baat kya hai varna main abhi yahi mar jaaunga”

“Aisa mat kaho, main bata to rahin hun” ---- varsha ne apni aankho ke aanshu ponchte huve kaha

“Acha chalo baith jao, baith kar araam se bataao, yaha hari-hari makhmali ghaas hai, ish par hum araam se baith sakte hain”

dauno aamne saamne baith jaate hain


“Jab tumne mujhe vahan chuva to mere zakham hare ho gaye” ---- varsha ne dabi huyi awaaj mein kaha

“kaise zakham varsha, main samjha nahi”

varsha kinhi gahre khayalo mein kho jaati hai

“kya huva varsha bataao na kya baat hai, main tumhe bahut pyar karta hun, tum mujhe sab kuch bata sakti ho”

“jeevan chacha ne kayin baar mujhe vahan chuva hai madan” --- varsha ne kaha aur kah kar ghutno mein sar chupa kar rone lagi


Ek pal ko madan hairaan rah jaata hai, phir khud ko sambhaal kar kahta hai, “main samajh gaya varsha bas chup ho jao”

“madan karib 2 saal tak maine apne hi ghar mein ye sab saha hai” --- varsha rote huve kahti hai


“kab ki baat hai ye varsha ?”

“koyi 6 saal pehle ki baat hai”

“ab to aisa kuch nahi hai na”

“nahi ab uski itni himmat nahi hai ki meri taraf nazar utha kar bhi dekh sake, lekin jeendagi ke vo 2 saal maine kaise bitaaye hain ye main hi jaanti hun”

“main samajh sakta hun varsha”

Chacha aksar mujhe ajeeb si nazro se ghurta tha par maine kabhi ish baat par dhyaan nahi diya tha. apne sage chacha par koyi kaise shak kar sakta hai

Lekin dheere dheere baat ghurne se aage badhne lagi. ek din main apni balcony mein khadi kheto ko dekh rahi thi. achaanak peeche se aakar chacha ne mere kandhe par kuch ish tarah se haath rakha ki main kaanp gayi. lekin jab maine chacha ki taraf dekha to vo bola, “beti kya baat hai ? yaha akeli kya kar rahi ho ?”

Ish tarah vo kishi na kishi bahaane mujhe chuta raha


lekin ek din usne had kar di. main apne ghar ke peeche ke garden mein ghum rahi thi, chacha bhi vaha aa gaya aur mere saath tahlne laga. chalte chalte vo idhar udhar ki baate kar raha tha. achaanak mujhe apne vaha peeche kuch mahsush huva. Maine turant peeche mud kar dekha to kuch nahi dikha. Maine chacha ki taraf dekha to vo muskura diya.

mujhe kuch samajh nahi aa raha tha ki vo aisa kyon kar raha hai, aur sach pucho to us vakt itni samajh bhi nahi thi, ishliye maine chacha ki harkat ko andhekha kar diya

kuch din shaanti se beet gaye

Phir ek din ki baat hai, shaam ka vakt tha, main apne ghar ki chat par khadi thi.

Main kinhi khayalo mein khoyi thi, achaanak mujhe apne peeche vaha kuch mahsus huva

Main chonk kar mud gayi


“Kya huva varsha beti” chacha ne gandi si hansi hanste huve pucha


“Kuch nahi chacha ji bas yu hi aapko dekh kar chonk gayi” --- maine kaha

main aur kya kahti, par mujhe tab pura yakin ho gaya tha ki chacha jaan bujh kar mere saath chedkaani kar raha hai

holi wale din to chacha ne had hi kar di

main holi ki masti mein dubi huyi thi. kuch na kuch tarkib laga kar sabhi ko rang rahi thi

maine apne kamre mein khaas hare rang ka gulaal rakha tha, vo lene ke liye mein apne kamre mein ghusi hi thi ki peeche peeche chacha bhi aa gaya

usne mere vaha haath rakh kar kaha, “ab jawan ho gayi ho varsha beti, thodi mauj masti kiya karo, ye kya bacho ke khel khelti ho…. aao asli holi manaate hain”

chacha ne pee rakhi thi tabhi uski itni himmat ho gayi thi.

mujhe ush vakt itna gussa aaya ki maine ek thappad uske gaal par zad diya

main bhool gayi thi ki vo mera chacha hai

“acha kiya varsha, jab vo bhool gaya ki tum uski bhatizi ho to tum kyon bhala ushe chacha samjhogi”


lekin phir bhi uski besarmi nahi ruki madan, vo baad mein bhi moka dekh kar mujhe chedne se baaz nahi aaya.

“kya tumne ghar mein kishi ko ye baat nahi bataayi”

“kishe bataati madan, pita ji jeevan chacha par aankh meech kar vishwas karte hain aur tumhe to pata hi hai, meri maa ko guzre 8 saal ho chuke hain”

“phir baad mein ye sab kaise ruka varsha”


ek din main shaam ke vakt chat par khadi thi, chacha vaha aa gaya aur mere baju mein khada ho gaya

main jaane lagi to vo bola, “varsha beti tum mujh se dur kyon bhagti ho, main to tumhe tumhaari jawani ka maja dena chaahta hun, aao tumhe kuch seekha dun varna ye jawani beet jaayegi aur tum haath malti rah jaaogi”

“theek hai chacha ji main taiyar hun”

“arey vaah !! kya sach !!” --- chacha ne kaha

“haan chacha ji chaliye pita ji se ye nayi shiksa shuru karne se pehle aashirwad ley aati hun”

ye shun kar chacha thar thar kaanpne laga

ush din maine thaan liya tha ki chaahe pita ji kuch bhi samjhe mein unhe chacha ki kartuto ke baare mein bata dungi

jaise hi main vaha se chali chacha mere kadmo mein gir gaya aur bola, “beti maaf kar do aage se main tumhe pareshaan nahi karunga par rudra ko kuch mat bataao, vo mujhe jaan se maar dega”

mujhe yakin nahi tha ki vo itne araam se seedhe raste par aa jaayega. Ush din ke baad usne mujhe kabhi pareshaan nahi kiya

“varsha maine sapne mein bhi nahi socha tha ki tumne itna kuch saha hoga” --- madan ne dard bhari awaaj mein kaha


“Madan aurat baahar ghumte bhediyon se to phir bhi nipat ley lekin ghar ke bhediyon ka kya ?… jo apne hokar bhi paraye ban jaate hain aur sab riste naate bhula kar apni bahan betiyon ko bas ek sharir samajh kar un par tut padte hain” -----varsha ne rote huve bhaavuk ho kar kaha


“bas varsha chup ho jao, mujhe lag raha hai ki main bhi ek bhediya hun…. na main tumhe vaha chuta na tumhe ye sab yaad aata, par mera yakin karo varsha main bas tumhe pyar kar raha tha aur kuch nahi”

“pata nahi kyon madan mujhe acha nahi laga, mujhe yakin hai ki ab tum samajh sakte ho”

“main samajh raha hun varsha, chhodo ye baate dekho kitni pyari chaandni raat hai”

“par ish chaandni raat ne aaj ghar se nikalna muskil kar diya tha madan, badi muskil se darte darte aayi hun main”

“Main tumhe bahut pyar karta hun varsha tumhaari ye dardnaak kahaani sun kar dukh huva par tum par aur jyada pyar aa raha hai kyonki tumne itna kadva sach mujhe bataaya hai jo shaayad hi koyi ladki apne premi ya pati ko bataayegi”


madan varsha ko baahon mein bharna chaahta hai lekin dar raha hai ki kahin varsha ko phir se kuch bura na lag jaaye



“tum mere sab kuch ho, mera tumhaare shiva koyi aur nahi hai, mujhe kahin ley chalo madan, yaha se bahut dur jaha hum shaanti se rah sakein”

“to tum ab mere saath chalne ko taiyar ho”


“maine mana kab kiya madan, main to….”

Tabhi madan haath ka ishaara karke varsha ko tok deta hai

“ruko”

“kya huva madan”

“shhh…… thodi der chup raho”


varsha bilkul chup ho jaati hai aur madan ko hairani bhari nazro se dekhti hai

“tumhe kuch sunaayi de raha hai” ---- madan ne dheere se pucha

“hmm…. Haan kishi ke cheekhne ki awaaj aa rahi hai”

“mujhe laga mujhe vaham ho raha hai”

“mujhe dar lag raha hai madan ye aadhi raat ko kaun cheenkh raha hai, aisa lag raha hai jaise koyi rote huve cheenkh raha hai”


“kuch samajh nahi aa raha ?”

“tumne kya pehle bhi yaha aisi awaaj suni hai”


“nahi varsha, vaise bhi main peechle 3 din se hi raat ko khet mein ruk raha hun, pehle pita ji hi rukte the, kya main dekh kar aaun ?”

“madan mujhe bahut dar lag raha hai, mujhe ghar jaana hai”

“arey darne ki kya baat hai, main to tumhaare saath hun na”

tabhi unhe itni jor ki cheenkh sunaayi deti hai ki madan bhi ghabra jaata hai. varsha baithe baithe madan ko jakad leti hai


“ye kya ho raha hai yaha madan ? mujhe bahut dar lag raha hai”

“p…p…pata nahi varsha, main khud hairan hun, 3 din se to maine kuch nahi suna aaj na jaane kya ho raha hai, chalo main tumhe ghar tak chhod aata hun, baad mein aakar dekhunga ki kya chakkar hai”

“koyi jarurat nahi hai madan kuch dekhne ki aisa karo tum bhi ghar jao, subah aakar dekhna jo dekhna ho”


“arey nahi varsha kheto ko chhod kar main kahin nahi ja sakta mere alawa yaha koyi nahi hai”